ABA Q&A [3] Token 代幣制度教出機械人？

代幣制度 Token system 係ABA 中常見嘅技術，簡單來講貼紙板中有空格，答啱問題或做出指定行為，獎一個貼紙，儲齊全部可以換指定獎品。

👍 一般來講，對初接受訓練，需要非常清晰，有系統性，有視覺提示嘅學生（唔只係小朋友）都非常受用。尤其未有語言理解基礎能力嘅人仕，令佢哋明白因果，對佢哋嘅要求，完結嘅時間，簡單易明。

💰 大眾對代幣制度有誤解係只適合應用於嚴重自閉症人仕或智障學生，其實實情係你同我每日都用緊 - 錢！成人版：完成一件工作或返工一段特定時間，會收到特定數量嘅代幣：錢，而儲夠一個特定數量嘅代幣：錢，就可以換領希望得到嘅貨物，以滿足我哋嘅需要。例如：一餐溫飽，一間屋，一件大褸，一部遊戲機。

👦🏻 🔜 👨🏻 所以其實原理係一樣，分別係代幣道具嘅形式，需要付出嘅努力，等待交換嘅時間。所以唔係代幣制度出問題，而重點係點樣令到成件事一步一步轉化為成熟大人自然嘅模樣。

～～～～～

【俾貼紙佢唔care？】🤷🏻 係，好多學生都唔care個貼紙！

有時大眾會誤解：獎貼紙＝代幣制度 ❌ 如之前討論，冇指定儲齊數量，冇交換獎品，唔係一個代幣制度，只係一個貼紙作為獎品。如果係小朋友喜歡嘅卡通人物，可能會起到獎勵作用，不過如果唔係嘅話，只不過係一張貼紙。

✅ 所以呢個係訓練步驟問題，要訓練小朋友理解當中集齊嘅概念，指定目標行為，同埋交換嘅係一啲有獎勵性嘅物品。就算係一個普通嘅tick，都可以發揮作用。

～～～～～

【長大後只有貼紙 / 代幣先做？】🤖 我見過，我真係見過。。。。。。🙈

有已經成年嘅自閉症學生，貼紙板裡面有30個貼紙，每答啱一條問題有一個貼紙，儲齊30個貼紙先可以休息。冇咗個貼紙板佢真係唔知發生乜事。

🚨 所以呢一個係 fade out (減退) 嘅問題，要回歸自然。代幣制度嘅缺點係唔自然，入侵性（要近身不停俾貼紙）。訓練初期（唔係每個個案都需要）或特定嘅時間，代幣係好幫手，但係習慣上手之後，就要計劃好步驟飛走佢，減少我哋自己對代幣制度嘅依賴。🚨

～～～～～

⚖️ 當然我哋亦會討論做人唔係淨係為錢，好多行為會有其他動機，同埋呢個世界好多嘢錢係買唔到，呢點可以慢慢詳細探討，例如只限某一種課題使用代幣，其他行為回應自然嘅後果。

Comments