Mand 自發性溝通 [3] 完全開始唔到練習，點算？

上回分享過，當孩子使用行為溝通，我哋可以應對嘅步驟。

不過仍然有家長表示，面對有持續問題行為，語言能力比較弱，或者自閉症嘅小朋友，已經好難由頭來過。當家長嘗試練習，要求小朋友講嘢，推多兩推。又或者一收起小朋友想要嘅物件，示意唔俾，或者等一等，小朋友立即發脾氣，完全接受唔到，逼於無奈唔敢再挑戰。🥶

想改善整體情況，就要教識小朋友明白

《the Power of Language：語言嘅威力》💪

就講就到，說話係有效而且快捷方便嘅，比發脾氣更容易更舒服。

🎁 免費送大禮：如果情況未能順利練習，一開始就多送大禮。 展示物件 ➡️ 大人立即講出要使用嘅短句 ➡️ 立即送上該物件 係冇壓力情況下，將物件名稱＋物件聯繫一齊，教識小朋友要說話嘅時機。 🪄

🎩 變魔術：Ding 一聲就有 要令孩子明白溝通嘅意思，只要講出目標生字，相應嘅物件就會立即出現，講包有包，講餅有餅。 立即嘅意思係「1 秒」之內遞出，有時孩子努力跟講，講完之後大人先去拎餅乾再拎碗再打開，中間相隔時間太長，令說話同物件嘅關聯性減弱，等待嘅過程中又可能發生問題行為，自然就會減低小朋友理解語言嘅威力。

🎯 目標簡單清晰：按小朋友嘅能力，確定要講嘅句子。 如果句子太長太複雜，超出能力範圍，小朋友會覺得太難又低成本效益，自然會覺得太煩唔再願意多講。所以先決定關鍵字，或者可能只係近似嘅發音，都可以。練習流利之後，配合當時嘅能力，加長句子，之後加入真正嘅Magic word “please”～

～～～～～

🏵 先打好基礎，教識小朋友語言嘅威力，溝通嘅時機，令小朋友發現原來唔使咁辛苦發脾氣㗎，講出嚟就得㗎喇～

🤗 再重複練習，定立清晰又合理嘅目標，多啲鼓勵孩子嘅嘗試，欣賞佢付出嘅努力，相方都放輕鬆～自然練習就會暢順得多～